Jos 18 | ZomZIV | STEP | Israel mipi bup Shiloh ah kikhawm uh a, tua lai-ah Kikhopna Puanbuk a lam uh hi. Tua gam amau ukna nuai-ah a tun khit hangin,

Joshua 18

Gam Omlaite Khenna

1 Israel mipi bup Shiloh ah kikhawm uh a, tua lai-ah Kikhopna Puanbuk a lam uh hi. Tua gam amau ukna nuai-ah a tun khit hangin, 2 gouluah a ngah nai lo Israel behte sagih a om lai hi. ^a

3 Tua ciangin Joshua in Israel-te tungah: “TOPA na pate uh Pasian in note hong piaksa gam na lak ding uh bang tanvei ngak lai ding na hi uh hiam? 4 Beh khatah mi thumta seh un. Keimah in amaute gamvel dingin ka sawlkhia dinga, amaute in a goutanh ciat ding uh tawh kizui-in lai-in a ciamteh ding uh hi. Tua ciangin kei kiangah hong ciah ding uh hi. 5 Note in na gam uh seh sagih na suah ding uh hi. Leitaw lama ama gamah Judah omsuak dinga, leilu lama ama gam mah ah Joseph innkuan a omsuak ding hi. 6 Gam, khen sagih a khenna lai ah na ciamteh khit uh ciangin hih lai keima omna-ah hong puak in, TOPA eite Pasian omna munah ai kong lotsak ding hi. 7 Ahi hangin Levi-te in no lakah tanh a ngah kei ding uh hi; bang hang hiam cih leh TOPA tungah siampi nasep amau gouluah ahi hi. Tuateh Gad, Reuben le Manasseh beh alangte in Jordan nisuahna-lam pangah amau luahna ngah khin uh hi. TOPA nasem Moses in amaute a piaksa ahi hi,” a ci hi. ^b

8 Gam sung teng gamlim a suai khia dingin mite a kuan uh ciangin Joshua in amaute lamlak-a, “Pai unla, gam va encianin lai-in hong ciamteh un. Tua khit ciangin kei kiangah hong ciah kik un; keimah in TOPA omna hih lai Shiloh ah ai kong lotsak ding hi,” a ci hi. 9 Tua ciangin mite kuankhia uh a gamsung khempeuhah a vak kawikawi uh hi. A khuakhua in khen sagih suahin laizial tung khatah ciamteh uh a, Shiloh giahphual a Joshua kiangah a ciah kik uh hi. 10 Tua ciangin Joshua in Shiloh ah TOPA omin ai lotsak-a, amau beh khenna tawh kizui-in tua lai-ah Israel-te gam a hawmsak hi. ^c

Benjamin Sehtanh

11 Benjamin beh a bawng’bawng’te adingin ai a pha hi. Amau sehtanhna gam, Judah le Joseph behte gam kikal hi a:

12 Amau gamgi leilu-lam pangah Jordan pan kipanin Jericho leilu-lam siik kantana, nitumna-lam manawhin mualtung gamah lut a Beth Aven sehnel gamah suakkhia hi. 13 Tua panin Luz (tua pen Bethel) leitaw-lam siik kantan a, Beth Horon Nuainung leitaw lam mualtunga Ataroth Addon ah paisuk hi. ^d
14 Mual panin Beth Horon maingatin gamgi leitaw lamah kihei-in nitumna-lam pang leitaw lamah kihei a, Judah mite khuapi khat ahi Kiriath Baal (tua pen Kiriath Jearim) ah suakkhia hi. Hih in nitumna-lam pang ahi hi.
15 A leitaw-lam pang nitumna lama Kiriath Jearim mongte panin kipana, Nephtoah Tuite nakah gamgi suakkhia hi. 16 Rephaim Kuam leilu lama om, Ben Hinnom Kuam maingatin mualbul lamah gamgi a paisuk hi. Hinnom Kuam zomsuka, Jebus-te khuapi siik leitaw lamah paisuk in En Rogel a tungsuk hi. 17 Tua ciangin leilu lamah kual-a, En Shemesh ah pai-in Adummim Ciangpi a maingat Geliloth tawh kizoma, Reuben’ tapa Bohan’ Suangpi a bansuk hi. 18 Tua in Beth Arabah ^{▼▼18.18 Septuagint; Hebrew duang pai-in Arabah maingat hi} leilu-lam siik zoma, tuateh Arabah sungah a lutsuk hi. 19 Tuateh Beth Hoglah leilu-lam siik ah pai a, Ci Tuipi ^{▼▼18.19 Tua pen Si Tuipi.} gei leilu lama Jordan tun leitaw lamah a suakkhia hi. Hih in leitaw-lam gamgi ahi hi. ^g
20 Nisuahna-lam pang gamgi Jordan gun ahi hi.

Hihte Benjamin behte luah ding, a kimkota ciamtehna gamgite ahi hi.

21 Benjamin behte in a bawng’bawng’un a nuai-a khuapite a nei uh hi:

Jericho, Beth Hoglah, Emek Keziz, 22 Beth Arabah, Zemaraim, Bethel, 23 Avvim, Parah, Ophrah, 24 Kephar, Ammoni, Ophni le Geba - khuapi sawm le nih le a khua neute ahi hi.
25 Gibeon, Ramah, Beeroth, 26 Mizpah, Kephirah, Mozah, 27 Rekem, Irpeel, Taralah, 28 Zelah, Haeleph, Jebus-te khuapi (tua pen Jerusalem), Gibeah le Kiriath - khuapi sawm le li le a khuaneute ahi hi.

Hih in Benjamin bawng’te gouluah ahi hi. ^h